UG Media

ემიგრაცია: დროებითი არჩევანი თუ მუდმივი რეალობა

საქართველოდან ყოველწლიურად ათასობით ადამიანი მიდის უცხოეთში სამუშაოდ ან სასწავლებლად უკეთესი შესაძლებლობების გამო, თუმცა დროთა განმავლობაში მათი დიდი ნაწილი ახალ გარემოში მკვიდრდება და სამშობლოში დაბრუნებას აღარ გეგმავს.

ემიგრაცია საქართველოში ერთ-ერთი ყველაზე მნიშვნელოვანი სოციალური პროცესია. ადამიანები ძირითადად უკეთესი სამუშაო პირობებისა და სტაბილური შემოსავლის გამო ტოვებენ ქვეყანას. მიუხედავად იმისა, რომ ბევრი მათგანი თავიდან დროებით წასვლას გეგმავს, რეალობა ხშირად სხვაგვარად ვითარდება. უცხოეთში ცხოვრების პერიოდში ემიგრანტები ახალ გარემოს ეჩვევიან, პოულობენ სამუშაოს და ქმნიან ყოველდღიურ რუტინას, რაც დაბრუნებას უფრო რთულს ხდის. შედეგად, დროებითი გადაწყვეტილება ხშირ შემთხვევაში გრძელვადიან ან მუდმივ ცხოვრებად იქცევა. ეს პროცესი გავლენას ახდენს როგორც ოჯახებზე, ისე ქვეყნის სოციალურ და ეკონომიკურ მდგომარეობაზე. აღნიშნულ საკითხზე 21 წლის ნია თვლიდიანი გვესაუბრება, რომელიც იტალიაში უკვე 13 წელია ემიგრაციაშია.

– რამდენი წლის იყავით, როცა იტალიაში გადახვედით და როგორ გახსოვთ ის პერიოდი?

–8 წლის ვიყავი და პატარაობიდან ცოტა თუ მახსოვს ამის შესახებ, თუმცა ჩემთვის ძალიან რთული პერიოდი იყო, რადგან, ფაქტობრივად, ჩემს მეგობრებს და ახლობლებს დავშორდი. ეს უკვე მრავალ წლიანი მონატრების მერე გავაანალიზე.

- 13 წლის შემდეგ ემიგრაცია თქვენთვის დროებითი არჩევანია თუ უკვე მუდმივი რეალობა?

–სამწუხაროდ, ამ ქვეყანაში არსებობა უკვე ჩემი ცხოვრების ნაწილია.

- ფიქრობთ თუ არა საქართველოში დაბრუნებაზე და რა გაჩერებთ ან გიბიძგებთ ამ გადაწყვეტილებაში?

– თუ მომეცემა შესაძლებლობა, რომ დავბრუნდე და ვინახულო ჩემი სამშობლო და ხალხი ბედნიერი ვიქნები, თუმცა სამუდამოდ საცხოვრებლად - არა. ამას მრავალი მიზეზი აქვს, ერთ-ერთია ის, რომ საქრთველოს არ აქვს განვითარების იმდენი შესაძლებლობა, რაც იტალიას.

სხვადასხვა კვლევების მიხედვით, უცხოეთში მცხოვრები ქართველთა რაოდენობა დაახლოებით 800,000–900,000-ს აღწევს. International Organization for Migration და გაეროს მონაცემებზე დაყრდნობით, ეს რიცხვი წლების განმავლობაში სტაბილურად იზრდება. შეფასებებით, ეს ნიშნავს, რომ დაახლოებით ყოველი მეხუთე ქართველი ქვეყნის ფარგლებს გარეთ ცხოვრობს. TV პირველის მიხედვით, ამ ინფორმაციას მსოფლიო ბანკზე დარდნობით ავრცელებს, ქართულ ეკონომიკაში უცხოეთიდან გადმორიცხული თანხების წილი წლიდან წლამდე იზრდება.

კოალიცია „ძლიერი საქართველოს“ წევრი თამაზ დათუნაშვილი ამბობს, რომ „დაახლოებით 3 მლრდ. 300 მლნ დოლარია ის თანხა, რომელიც ყოველწლიურად შემოდის საზღვარგარეთიდან“. ეკონომიკის ექსპერტი პაატა ბაირახტარი კი აზუსტებს, რომ წინა წელთან შედარებით, გადმორიცხული ფულის დაახლოებით 4%-იანი ზრდა ფიქსირდება. ეკონომისტების შეფასებით, ემიგრანტების ფულადი გზავნილების გარეშე ქვეყნის ეკონომიკა არსებულზე გაცილებით მძიმე მდგომარეობაში იქნებოდა.

ემიგრაციის ძირითადი მიზეზებია: დაბალი შემოსავალი, უკეთესი სამუშაო პირობები და უკეთესი განათლების შესაძლებლობები, რის გამოც ბევრი ადამიანი თავდაპირველად დროებით მიდის, მაგრამ საბოლოოდ უცხოეთში რჩება.