DATA149.1.19

სამოქალაქო მოძრაობა „ჩემი ქალაქი მკლავს“ , რომელიც შექმნილია საქართველოში ეკოლოგიური და სოციალური მდგომარეობის გასაუმჯობესებლად, ეკო ცნობიერების ამაღლების მიზნით, საქართველოს სკოლებში შეხვედრებს ატარებს. გუნდის წევრები წარადგენენ ეკო წიგნის პრეზენტაციას. შეხვედრის ბოლოს მოსწავლეებს უტარებენ ტესტირებას და გამარჯვებული გუნდის წევრებს სერტიფიკატებითა და ეკო წიგნებით ასაჩუქრებენ.

„ამ პროექტის მიზანია ეკო ცნობიერების ამაღლება სკოლებში. ეს საქმიანობა 2021 წელს დავიწყეთ. მანამდე ეკოლოგიასთან დაკავშირებით პოსტებს მხოლოდ სოციალურ ქსელში ვათავსებდით, შემდეგ ვიფიქრეთ, რომ რაიმე სხვაც გაგვეკეთებინა და გადავწყვიტეთ წიგნი შეგვექმნა, რომელსაც სკოლებში წარვადგენდით. წიგნი გათვლილია მე-7, მე-8, მე-9 კლასის მოსწავლეებზე. ეს სეგმენტი შევარჩიეთ, რადგან გვსურს მოსწავლეებს პატარა ასაკიდანვე ჰქონდეთ ინფორმაცია გარემოს დაცვის საკითხებზე“ - გვითხრა სამოქალაქო მოძრაობის „ჩემი ქალაქი მკლავს“ დამფუძნებელმა გიორგი ჯაფარიძემ.

გიორგის შეფასებით, მოსწავლეების ჩართულობა პროექტში საკმაოდ მაღალია. მათი პროექტით ძალიან ბევრი მოსწავლე ინტერესდება - ჯგუფის წევრებს ხშირად მიმართავენ და სთხოვენ, რომ მათ სკოლაშიც მივიდნენ. მისი თქმით, სკოლებიც ძალიან დიდ როლს თამაშობენ ეკო ცნობიერების ამაღლებაში, რადგან საკმაოდ ბევრმა სკოლამ გამოიჩინა ინიციატივა და დაუკავშირდა ორგანიზაციას. ეკო წიგნი შედგება 20 ეკოლოგიური რჩევისგან. წიგნის მთავარი პერსონაჟები არიან ეკო და ფლორა, რომლებიც მოსწავლეებს ეკოლოგიურ რჩევებს აძლევენ. სამოქალაქო მოძრაობის წევრები ცდილობენ მინიმალური რაოდენობის ქაღალდი გამოიყენონ და მაქსიმალურად ბევრი ინფორმაცია გადმოსცენ. მოძრაობის დამფუძნებლის თქმით, ამჟამად ოთხი ტიპის წიგნი და ეკო სამაგიდო თამაში აქვთ გამოშვებული.

გიორგი ჯაფარიძე ორგანიზაციის სამომავლო გეგმებზეც გვესაუბრა და გვითხრა, რომ გეგმავენ გამოშვებული ეკო წიგნების გაერთიანებასა და უფრო მეტი დეტალური ინფორმაციის გადმოცემას. ასევე, ეკო სამაგიდო თამაშებთან ერთად, სურთ გამოუშვან ეკო ანბანი. მათი ერთ-ერთი მთავარი მიზანი, რაც შეიძლება მეტი ახალგაზრდისთვის ხმის მიწვდენაა.

სამოქალაქო მოძრაობის საქმიანობასთან დაკავშირებით „ახალი ქართული სკოლის“ დირექტორი ნანა მონიავა გვესაუბრა: „მსგავსი შეხვედრები ჩვენი და არამარტო ჩვენი მოსწავლეებისთვის ძალიან მნიშვნელოვანია. ეკოლოგიასთან დაკავშირებულ საკითხებზე ინფორმაცია მოსწავლეებს პატარა ასაკიდანვე უნდა ჰქონდეთ. მიმაჩნია, რომ ამაში განსაკუთრებულ როლს თამაშობს სკოლა და ასევე ისეთი ორგანიზაციები, როგორიცაა „ჩემი ქალაქი მკლავს“. გიორგი ჯაფარიძემ ეკო წიგნის პრეზენტაცია ჩვენს სკოლაშიც ჩაატარა და საკმაოდ მნიშვნელოვანი ინფორმაცია მიაწოდა მოსწავლეებს. ისინი აქტიურად იყვნენ ჩართულები კითხვა-პასუხის რეჟიმში და ტესტირებაც წარმატებით გაიარეს, რის გამოც მათ სერტიფიკატები გადაეცათ. ვაფასებ გიორგი ჯაფარიძისა და მისი გუნდის საქმიანობას, რადგან საჭირო ნაბიჯებს დგამენ ქვეყნის ეკოლოგიის გასაუმჯობესებლად და ეკო ცნობიერების ასამაღლებლად“.

სამოქალაქო მოძრაობამ უკვე 68 საგანმანათლებო დაწესებულებასა და 1967 მოსწავლესთან დაამყარა კომუნიკაცია.

2023 წლის იანვრიდან მოძრაობა, ჩეხური არასამთავრობო ორგანიზაცია „არნიკას“ და ჩეხეთის საგარეო საქმეთა სამინისტროს „TRANSITION” პროგრამის მხარდაჭერით, ჩაერთო საქართველოში ჰაერის ხარისხის მონიტორინგის სამოქალაქო ქსელის შექმნის სამუშაოებში. მათი მიზანია ხელი შეუწყონ ჰაერის ხარისხის ინფორმაციაზე ხელმისაწვდომობის გაზრდას და მონიტორინგის ქსელით მოპოვებული ინფორმაციის საფუძველზე აღრიცხონ საქართველოს დაბინძურებული მუნიციპალიტეტები და დასახლებები, რაც მათ საშუალებას მისცემს, განსაზღვრონ სხვადასხვა რეგიონში მუშაობის პრიორიტეტები.

ამჟამად აპარატები დაყენებულია თბილისის 32 უბანსა და საქართველოს შემდეგ ქალაქებში: რუსთავი, კასპი და ჭიათურა. მოქალაქეებს ჰაერის ხარისხის შემოწმება შეუძლიათ ჰაერის ხარისხის რუკაზე, რომელიც „მწვანე პოლუსის“ ვებ-გვერდზეა განთავსებული.