UG Media

„ზაქარას კეთილი მანქანა“

„ზაქარას კეთილი მანქანა” ზაქარია დოლიძის პროექტია, რომელიც მიუსაფარ ცხოველებს თავშესაფრითა და საკვებით, ხოლო ინვალიდ ძაღლებს მის მიერვე შექმნილი ეტლებით სრულიად უსასყიდლოდ უზრუნველყოფს. ზაქარია სახლებს, ეტლებსა და რეზერვუარებს საკუთარი ფინანსებით ამზადებს და თავისი მანქანით მიაქვს ადრესატამდე.

„ჩემი მიზანი საზოგადოებისათვის არსებული მდგომარეობის ჩვენება და მათში ცოცხალი არსებების დახმარების სურვილის აღძვრა იყო, რაც, ვფიქრობ, მოხერხდა კიდეც”-აღნიშნავს ზაქარია დოლიძე.

პროექტი უკვე ექვსი წელია არსებობს და ამ დროის განმავლობაში მიუსაფარი ცხოველებისთვის 1 000-ზე მეტი სახლი აშენდა. დამფუძნებელი სიამაყით აღნიშნავს, რომ მისმა კეთილმა მანქანამ მთელი ქვეყნის მასშტაბით უკვე 120 000 კმ გაიარა.

ზაქარიას ახალი პროექტის დაწყება მისი ოთხფეხა მეგობრის "რიკის", იგივე "ვალიკოს" ავადმყოფობამ გადააწყვეტინა: „ვალიკოს ვუშველე, ის დღეს სრულიად ჯანმრთელია, თუმცა ქვეყანაში არსებული მდგომარეობის გამო, რაც სოციალური ქსელების მეშვეობით ძალიან კარგად ჩანს, მასშტაბური მზრუნველობითი კამპანია წამოვიწყე“,- აღნიშნავს ზაქარია.

მართალია, კეთილი საქმის კეთება მარტომ დაიწყო, თუმცა თანდათან სხვა ნაცნობი თუ უცნობი ადამიანებიც შეუერთდნენ. ახლა უკვე პროექტში არაერთი მოხალისეა ჩართული. ერთ-ერთი მათგანი ნათია სარაჯიშვილია, რომელიც საკუთარ გამოცდილებას გვიზიარებს: „ჩართულობისთვის ძალიან ბევრი საშუალებაა - ფიზიკური, მორალური, თუნდაც ფინანსური ან მატერიალური. მთავარი სურვილი და დაკავშირებაა, გვახარებს ყოველი ინიციატივა, მოტივაციას გვაძლევს ყოველი გამოწვდილი დახმარების ხელი. შეიძლება ეს არ იყოს ჩაქუჩის აღება და სახლის აშენება, მაგრამ იყოს სწორი აზროვნების ჩამოყალიბება სულიერი არსებების მიმართ ლოიალური და მზრუნველობითი დამოკიდებულებების შექმნა, მაგალითის ჩვენება. სწორედ ამ მიზანს ემსახურება ჩვენი საქმიანობაც“.

საქართველოსთვის მიუსაფარ ცხოველებზე ზრუნვა ერთ-ერთი აქტუალური გამოწვევაა. არ არსებობს სახელმწიფო ინსტიტუტი, რომელიც პასუხისმგებელია აღნიშნული საკითხის მოგვარებაზე. ცხოველების უფლებადამცველი ნათია ჩიქოვანი გვეუბნება, რომ დიდ ქალაქებთან შედარებით რაიონებსა და სოფლებში ცხოველების მიმართ სასტიკი მოპყრობის შემთხვევები გაცილებით მეტია: „რეგიონებში საერთოდ ლაპარაკიც არ არის ცხოველებზე ზრუნვაზე, მეტისების არასასურველ ლეკვებს პირდაპირ ნაგავში ყრიან ან ქუჩაში ტოვებენ. პასუხს ვერავის მოსთხოვ. გამოსავალი მხოლოდ ერთიანი სისტემის შექმნაა, რომელიც ქვეყნის მასშტაბით ორგანიზებულად იმუშავებს“.

2015 წლის მონაცემებით მხოლოდ თბილისში 43 000-ზე მეტი მიუსაფარი ძაღლი იყო აღრიცხული. სავარაუდოდ, დღეისთვის ეს რიცხვი გაზრდილია. ამ მდგომარეობის გათვალისწინებით ისეთი პროექტები, როგორიც „ზაქარას კეთილი მანქანაა“ მეტ მხარდაჭერას საჭიროებს, რადგან ყოველგვარი კომერციულობისა და შემოსავლის გარეშე ზაქარიას კეთილ მანქანას მხოლოდ უანგარო სიკეთე ამოძრავებს.

19 March 2020

საქართველოს

უნივერსიტეტი

„ზაქარას კეთილი მანქანა“